最難寫是編者話

何謂公義

FacebookTwitterWhatsAppLineGoogle+

做人太過一根筋,拘泥於自己嗰套,食檸檬嘅往往係自己,因為你堅持時人堅持,所以你永遠不會獲他人接納,畢竟世事無絕對,只有真情趣。


同髒神夾住做嘢經常有爭執,無論生意或創作上,好多時佢否決我某啲決定或想法時,都指出我有「我覺得係就係」嘅問題,通常佢一咁講我就扯火,我梗係咁諗先同你講啦,唔係講嚟做咩,在情緒主導下,個焦點就轉咗去討論我點諗嘢嘅思路上,莫視咗本身要討論嘅事情。

「做人無須要在乎其他人嘅諗法,最緊要係堅持做返自己」喺傳媒大力渲染下,呢種想法逐漸滲入到大眾嘅骨髓,有堅持唔係唔好,只係當堅持變成固執,完全聽唔入其他人嘅講法時,做人就會流於偏頗。或者大家有類似經驗﹕面對一啲有佢講無人講嘅人係幾頭痛同煩厭,佢哋永遠覺得自己講嘅係不容挑戰嘅真理,寸步不讓。好似社會上一班成日將公義掛喺口邊嘅人,維護公義無問題,不過一定要按佢哋個標準做,因為佢講嘅係真理,其他人講就係歪理,故一項都不能改,在大是大非或原則性上嘅事係有絕對標準,只係落到具體執行上,係咪真係有絕對標準呢?以民主國度自詡嘅美國,個總統選舉制度係咪一人一票嘅絕對民主?特朗普當選已經畀咗個示範大家睇。又以懲治毒犯為例,有啲國家無情講,一定判死刑,甚至菲律賓總統早兩年時曾批准警察在捉拿毒犯時,如發覺有嫌疑,可以當場開槍射殺。有啲國家就選擇將毒犯判監,刑期視乎嚴重程度而定。上面嘅處罰方式令犯毒者得到應有懲罰,無話邊種最恰當。

堅持唔等如不變,適時聽下人講,自己再細心思考同消化下,合用嘅就用嚟改進下自己,無損個人堅持,諗過度過真係唔啱駛咪當聽下囉。條條大路通羅馬,做人太過一根筋,拘泥於自己嗰套,食檸檬嘅往往係自己,因為你堅持時人堅持,所以你永遠不會獲他人接納,畢竟世事無絕對,只有真情趣。