最難寫是編者話

返工著數多

FacebookTwitterWhatsAppLineGoogle+

「識人緊要過識字」,剛出來打工,睇的可能係學歷,日子久了,睇的就係閱歷。


成日話香港人鍾意返工,實情係點呢? 相信對好多人嚟講無所謂鍾意唔鍾意,為咗糊口,鍾唔鍾意都要做,運氣好嘅,入到間好公司﹔運氣差嘅,入到間專玩人事鬥爭的公司,返工如活受罪。通常情況係,公司內有部份同事跟自己夾啲,有部份就無咩兩句,大家客客氣氣就算。出嚟搵食,多一事不如少一事。

撇除鍾意與否,返工為搵食,一定睇人工有幾多,但除咗眼見的利益外,返工亦有一些唔易察覺到的好處。好似與同事間相處和合作,有助訓練和提升個人溝通能力,要做到呢點,大前提要有同事,因為有些工種未必有同事,或者有同事但彼此間未必會緊密接觸,好似職業司機和物業保安,通常係長時間一人工作,係休息時間才有機會跟同事或行家吹下水。大家坐的士時可能試過被司機撩傾偈,可能你覺得佢好煩,但對佢而言,可能靜咗好耐,難得有人上車傾兩句,就梗係好似鯊魚見血咁興奮…..

話題扯得太遠,公司是社會的縮影,同事們來自五湖四海,各有不同背景,如何和對方溝通,使工作順利完成,是一門學問。人人都識發聲,但可以完全表達自己唔係咁易,現實係唔少人 (包括我在內) 有時會出現辭不達意的意思,口中所講跟中心所想略有出入,接收一方好可能會錯意,誤會由此產生。同事間溝通出現誤會,令工作其中一個環節出錯,後果可大可小。溝通能力的訓練,不能一蹴而就,需要長時間鍛鍊。可能你話﹕「對住家人朋友,一樣訓練到溝通能力吖」個人咁睇,在工作環境中,為免出錯揹鑊,人會保持一定警覺性,呢份警覺性會令大家衡量一句說話應否講或者點講,日子有功,溝通能力就是這樣訓練出來。

返工另一個無型益處是增加對社會的認知,上段提過,返工有機會接觸到來自五湖四海的同事,如果工作上要對客的話,能夠接觸到的層面就更廣。跟唔同人接觸,有機會知道自己認知以外的事,記得初出嚟打工時,對股票一竅不通,後來有位炒股的同事教我相關的知識,雖然最後我無投入到炒股的世界,但都知道大概的玩法,將來有其他人講起時,也不至於完全對不上嘴。除咗知識層面的拓展外,返工可以培養到人脈,「識人緊要過識字」,剛出來打工,睇的可能係學歷,日子久了,睇的就係閱歷﹔在返工的日子,在每間公司會識到不同的同事和客戶,這些人可能係大家生命中的過客,亦可能是貴人,將來的事無人知,佢哋可能會在某日介紹工作或者生意畀你,甚至成為創業夥伴。唔係教大家去奉承或討好人嚟搵著數,只要做好自己就得,職場上的人脈培養,首睇工作表現,將心比己,朋友有份工要搵人,問有無介紹,你都唔會介紹一個刷鞋一流,辦事九流的人給對方吧。

返工好處點重有好多,篇幅關係,今日暫時到此為止。其實要感受到返工的好處,職業生涯的規劃很重要,了解自己想行的方向,按部就班而行,才能感受到返工的好處,若然返工只單純為錢,邊到錢多去邊到,這種水流柴式的職場生涯,就未必享受到返工的好處了。

 

相關文章﹕

為何要返工?

為何要返工?(2)