「食屎啦你」，這配上一副五行欠打的表情，出自由張學友飾演的烏蠅，而烏蠅這個角色，則來自一部35年前的經典港產片—–旺角卡門。
旺角卡門，1988年的電影，由王家衛編劇及執導，劉德華，張學友，張曼玉及萬梓良等人主演。
雖然已經係35年前的作品，但放在今日仍然唔覺老土，易入口之餘，亦好快令人投入到劇情之中。
這套戲相信好多朋友已經睇過，故劇情就唔再詳述。反而想講下點解覺得好睇，戲內唔少情節充滿衝突點，代入角色之中的話，未必知道點做決定，例如劉德華和張曼玉的一段情，張曼玉眼前明明有個前途一片光明的醫生唔要，偏偏愛上一個朝不保夕，今日唔知明日事的古惑仔劉德華，理性分析當然不合理，只不過愛情，真係可以咁理性？過多的理性，又可能已經唔係愛情而係計算。
再如劉德華和張學友這對情若兄弟的江湖手足，張學友飾演的烏蠅，是個不學無術，一日只想攞威的人，偏偏成事不足敗事有餘。而劉德華作為佢大佬，那怕呢個細佬闖咗咩禍，都一力保佢，最後連命都無埋，外人睇當然覺得戇居兼唔抵，不過當去返戲內劉德華個位，多年兄弟，當真可以輕易放手唔理？
人之為人，就係一個情字，而這個情字，很多時左右咗我們做決定，這些決定，甚至影響下半生如何過。睇完旺角卡門這套電影，或者大家對個情字會有更多體會。
Part 1
Part 2
