標籤:文化

人無夢想好正常

我夢想係發達、做飛機師、做畫家、做發明家…….

其實人是否一定要有夢想?可能大家都聽過星爺名句﹕「做人無夢想,同咸魚有咩分別?」聽落好似人無夢想就好大問題,不過細心諗下,無夢想又點? 我哋身邊好多人都無夢想,或者佢哋的夢想係成就他人的夢想,好似髒神在節目提到,父母的夢想就是成就仔女的夢想。

在這個夢想泛濫的年代,人人都講追夢,好多人的夢想,可能係人有我又有,到底那個是夢想還是喜好,好多人都未必搞得清楚。

關於更多夢想的討論,請各位聽以下節目。


 

Part 1

Part 2

 

P.S﹕有聽開我們節目的朋友,都知我們是行到邊錄到邊,話說兩位主持今次在某快餐店錄節目,錄得太興奮一時講大聲咗,嘈到隔離某位女士,打擾佢玩手機的雅興,如果呢位女士有機會聽到本節目,請多多包涵 😆

第十九集 玩吓啫,唔想咁傷神

玩物喪志,呢句說話就好似高掛衙門內那塊公正嚴明的牌匾,警剔我們不要玩得太深入太過龍,免得喪失理智,忘了正事。只是反過來想,玩得唔夠精唔夠深入,會否玩得唔夠過癮呢?

今集話題由雞口講改造模型帶起,佢話每盒模型要真金白銀買,改造失敗時,面對那堆廢件,感覺浪費了金錢,廢件留住又眼寃。髒神聽完後表示唔同意,佢認為雞口呢種想法,可能係教育出了問題的結果,令到雞口那一代人不願意面對失敗,佢進一步講,世上沒有事情可以一次就成功,學游水時難免飲幾啖水,學踩單車跌到皮破血流是免不了。有心玩一個嗜好,係不怕失敗及不斷鑽研,以挖掘更多樂趣。雞口的反應是﹕「玩吓啫,唔想咁傷神」。

之後的討論係點?唔講咁多,留返大家慢慢聽。


制度的誘惑 (1)

制度本來的目的係確保社會有序,有序方令社會更公平,只係人有時為了從制度中獲益,而扭曲了本來應做的行為,久而久之,會反過來埋怨制度的不公。


 

「等咗十年,點解我咁衝動,點解唔等多陣呢….」

故事係咁,阿仁為咗排公屋,一直拒絕老闆升職的安排,以免入息超出申請資格。最近老闆又舊事重提,阿仁見等咁耐都排唔到佢,就決定接受老闆好意,命運呢個時候同佢開咗個玩笑,阿仁升職3個月後收到通知,終於排到苦等多年的公屋,奈何佢入息水平已超過限額,已無入住資格。

雖然心底覺得阿仁好無志氣,為咗間公屋多年來放棄升職加薪的機會,如果佢一早升職,今日故事可能已經改寫,但見佢咁無癮就無謂再刺激佢。況且細心諗,就算佢升職,人工加得幾多?當佢加得3000蚊,而家一個人租間劏房,最平當5000蚊,加薪幅度都唔夠佢租間劏房。相反輪到公屋的話,月租千幾二千蚊,呢個租金佢應付到有突,兼居住環境一定好過劏房,故可以話阿仁無志氣,不過在居所難覓的今日,佢咁做又無可厚非。

阿仁件事,證明了制度對人的誘惑,制度本來的目的係確保社會有序,有序方令社會更公平,只係人有時為了從制度中獲益,而扭曲了本來應做的行為,久而久之,會反過來埋怨制度的不公。還記得幾年前,我在某報館做分類廣告sales,晚晚8點幾9點放工,逢星期五人哋享受小周末時,我就要捱到夜晚10點幾甚至1點先走得,唔知重以為我好多嘢做,實情是齋坐等收工。

剛入職時上司對我講﹕「我哋主力唔係搵新生意,只要keep住現有嘅客,填滿每日嘅廣告窿位就得」公司每日有最低要求的廣告量,當係20頁紙咁講,通常公司會開夠24或28頁,公司想做多啲生意係無可厚非。去到呢到,要橫叉一筆,講下公司的佣金制度,係行公佣制,要營業額達到某個標準先有佣分,只係如某位師姐所講,那個營業額的高度比ICC更高,就算佢做咗差不多廿年,都從未試過分佣。

每日只要填滿啲窿就可以收工,不過同事們習慣晚上7點後先入稿,新入職的我感到好奇怪,點解唔快手搞掂收工呢?之前提過,公司每日有基本的廣告量要求,其實同事們心知要湊齊20頁廣告已唔容易,更莫講話填滿24頁或更多頁。況且太早入稿,公司見你咁易追到,就會開多幾頁畀你繼續追,既然做多無佣分兼又要辛苦自己,同事們自然唔會搏,但求滿足基本要求就算數。方法係用時間換空間,每份報紙都有指定開機印刷時間,當接近赴印時,公司見廣告量唔夠就會收手,減少出紙數,意味大家可以交少啲貨。因此同事們會有默契地「袋住先」,有稿在手也不入,大家透過通訊群組夾定時間才一齊入稿。其實公司早知有此情況,但就無做檢討和改變,如是者每日返工就係玩拖時間遊戲,結果公司和同事們都係輸家,站在公司角度,我哋成班人齋坐,耗費公司資源又無生產力。站在同事角度講,當一晚白坐兩個鐘,一星期返五日工,一個月就白坐40個鐘,40個鐘我當去睇戲都睇到十幾廿套啦。

嗰段日子我體會到何謂上有政策,下有對策,每版報紙設定印刷時間,原意係令每個部門可以睇時間有系統地安排工作,結果這個時間死線卻成為了同事們減少交廣告稿的護身符。在日常生活中,好多時我哋批評社會有好多不公的制度,只係批評之前,我哋可否稍稍靜落嚟,諗諗究竟係制度問題,定係設計制度本身的人的問題呢。

相關文章

急住買樓定買債

有樓有成就?

雙打

之前的比畫活動,都是每位朋友獨力創作,今次編輯部搞搞新意思玩「雙打」,由兩位畫家聯手創作一張插畫,分組方法非常刺激,參加的朋友一齊參加抽籤,拍出一位未知的拍檔組成一隊,然後再在5組既定題目中抽出一題作為該組的指定題目,5組既定題目分別是香港、創作人、時間、夢和朋友。

這是本欄的一次新嘗試,也是各位參加者的新嘗試,創意爆棚的他們,在面對從未合作過,彼此繪畫風格相異的拍檔,到底會擦出怎樣的火花呢?

第一次<<雙打>>, Ready, Go!!!!

香港之流哂口水的美食

rush201903223

組名﹕lelezou X Kar= 卡樂女力


作品簡介﹕

夜幕初降,硝煙四起,貪吃嘴蠢蠢欲動,為了保衛身材苗條,卡樂b女力組只能拿起武器和熱量獸大戰三百回合以抵抗它的美食攻勢。

有樓有成就?

好多人覺得買到樓係有錢的表現,我明白大家點解咁諗,香港人太習慣睇錢做人,社會風氣好多時以錢去衡量一個人的成就,只要你有錢,你就係叻人


香港樓出名貴,原因有好多,例如之前探討過取消租管,令租樓同供樓的支出差唔多,出名識計數的香港人自然傾向買樓,供樓當儲錢,好過交租益業主。又有一個講法係國內客炒貴哂啲樓。當然近排講得最多係土地問題,無地起樓,樓價想唔貴都難。除咗經濟因素外,個人思想的改變,可能都係推高樓價的原因。我今年三十幾歲,發覺同我差唔多年紀的人,都唔多想同父母住,我的父母輩係無呢種諗法,可能我哋呢代的DNA發生突變啦。只係當人人想要自己的居所時,樓價自然愈搶愈高。

樓價高企,好多人覺得置業無望,社會慢慢出現咗以前無的現象,開始有人覺得買到樓係成功人生的指標,多得有心的傳媒大力炒作,好似有節目邀請一班不同社會背景的人,講下在樓價高企的今日佢哋為置業如何各出奇招,當中更針對性講到佢哋對置業的心態,唔少人覺得呢類節目嘩眾取寵,但亦唔排除有人受到影響。記得幾年前同合作開的印刷佬食飯,講開我買樓準備結婚,佢即時話﹕「叻仔,今時今日唔駛靠老豆老母,自己上到車。」印刷佬年紀做得我老豆,平時做嘢總帶住幾分長輩對晚輩的態度,自從知道我買樓後,感覺到佢態度係有唔同,多咗份之前無的敬意。印刷佬的反應係一個例子,有長輩和朋友知道我買樓後,態度都有改變,雖未去到前倨後恭,但多咗份之前無的尊重,特別係年紀比我細的朋友,佢哋覺得今時今日買到樓係一個成就,會覺得我已經上咗岸唔駛憂。

好多人覺得買到樓係有錢的表現,我明白大家點解咁諗,香港人太習慣睇錢做人,社會風氣好多時以錢去衡量一個人的成就,只要你有錢,你就係叻人,套用到買樓上,無論你係在今日瘋狂的樓市下置業,或者早前買落也好,都證明你有一定的財政實力,在香港社會凡事講錢的標準裏,你已是成功人士﹐只係作為過來人,我好誠懇同你講,買到樓唔等如有錢,買到樓只係借咗錢,重要係借咗好多錢,要還廿幾三十年,如果真係有錢就一炮過,邊駛問銀行借。

相關文章

家是生活的博物館

地從何來

自主前,請先自理

急住買樓定買債

急住買樓定急住買債

樓價升幅快過眨眼,我明白好多人擔心今日唔買,明日只會更貴,故寧可有買貴無買錯。我唔反對置業,只要自己能力應付到,在今日呢個環境,有自己物業始終勝過去租樓。只係眼見好多能力不足的人,急於衝入樓市,咁絕對係一個危機。


香港樓價貴絕全球,至於有幾貴,我唔係專家亦無數據分析,只能從自身經驗去講下,我4年前以四百萬買入現在的單位,4年後的今日已升至差不多六百萬,即是每年升幅約五十萬港紙。以前話買磚頭保值,而家買磚頭直頭升值,重要係你咩都唔駛做,就自然好似坐火箭咁升,都咪話唔神奇。

同髒神吹水時有傾下樓價高的現象,好多人話係土地問題。不過佢老人家就覺得係取消了租金管制的問題。有租管時,私人住宅的業主加租每兩年最多加你30%,不過自97年亞洲金融風暴後,政府為提振跌到殘的樓市而在98年取消了租管,從此業主加租再無限制,50%、100%,鍾意加夠200%亦可以。我有朋友租樓住,因為加租幅度大,每兩年搬一次,故他的家當盡量從簡,平時唔敢買太多嘢,怕搬屋時執餐死,就算租到新屋,好多家當亦懶得拆封,免得下次搬時再執。他的遭遇可能係唔少香港租客的縮影。1998年距離而家都十幾年,其實政府應否考慮重置租管呢?畢竟有租管時,租務市場與置業市場是分開的,你可以邊租屋邊打算,生活環境也不會因為大幅度加租而受影響,到有錢先考慮置業。

我認同髒神的睇法,記得細時的親戚係租樓住多,大家見面亦好少講買樓。就算買都要左計右計,人人話今日置業難,以前置業都唔係易事。聽長輩講,80年代買層幾百呎的樓幾十萬可以有交易,在今日睇呢個當然唔係咩大數目,只係放回以前的人工,我阿媽做工廠賺得果二千幾蚊一個月,幾十萬樓價就係天文數字。而以前買樓的息口係十幾厘計,絕非今日的低息可比,故話今日買樓難,以前一樣無咁易。正因為買樓唔易,故以前的人唔急住買,到今日買樓難度依舊,反而唔少人心急要做業主,尤其好多後生仔,一出社會做嘢就講要置業,有必要咁急嗎? 我認為同傳媒有多少關係,而家好興講個人空間,只要可以自成一角,再細的空間都無問題。記得未興劏房前,係講住板間房,其實兩者的尺寸係差不多,不同地方係板間房無獨立廚廁,需要幾戶人共用廁所及廚房,故住客們需要互相遷就,呢個居住環境話無拗撬就假,不過亦肯定有相處融洽的例子,細時睇電視劇都見唔少呢類橋段,幾戶人住板間房,食飯時一齊出大廳食,之後坐埋一齊睇電視吹水,都幾熱鬧。反觀而家的劏房,各種劏法都有,最正莫過於廁所上面係床。住呢種劏房個人空間係有,不過代價係隨時聞到屎味,到底值定唔值呢?

樓價升幅快過眨眼,我明白好多人擔心今日唔買,明日只會更貴,故寧可有買貴無買錯。我唔反對置業,只要自己能力應付到,在今日呢個環境,有自己物業始終勝過去租樓。只係眼見好多能力不足的人,急於衝入樓市,咁絕對係一個危機。「成功靠父幹」,唔少人特別係後生仔,在父母的支持下成功上車,父母愛鍚仔女的心無須質疑,只見佢哋一係加按自己的物業,或者攞養老金出來幫仔女支付首期就知。問題係供樓最重要係咩?一個穩定的工作環境及收入,以應付廿幾甚至三十年的按揭還款,還款係每個月還,唔會有假期畀你抖下。我無意貶低後生仔,只係好多後生仔剛出社會工作,職業生涯隨時有變,連帶影響收入。當經濟狀況出問題時,難道去向父母求救?佢哋又救得多少次呢?父母在出手幫仔女上車前,應否三思送給仔女的既是個安樂窩,同時是條長命債呢?

相關文章

家是生活的博物館

地從何來

自主前,請先自理

 

豬非豬

隨便要大家舉出豬的特徵,大家應會即時聯想到豬耳、豬鼻及豬尾…等等。趁豬年將至,我們搞了個燒腦的活動,邀請一班朋友以「豬非豬」為題,創作出既要有豬的感覺,又不能有豬的元素的「豬」出來,並借此向大家拜個早年,祝大家「豬」事順利,恭喜恭喜。


 

Kombi

Kombi 跨界設計師


作品簡介﹕

WELCOME – PIG CHIVALROUS –

恭喜發財

亥豬年

告別戌狗年,迎來亥豬年

卻突如其來地經歷了一場大規模的滅豬浩劫

但大家不要慌

「總相信這個世界是有奇蹟的」

睇睇我們成功踏足月球背面的歷史性大新聞

咁難做的事情我們都做到了

豬年裡還有什麼奇跡不能發生?

世界係一定有奇蹟

豬瘟係一定可平息

繪畫此賀年《寶豬神女》圖

為還在跟病魔們作戰的豬族們打打氣

以鎮豬驚

望世界萬物和平

願人類造福生靈

相關節目﹕

雙生雙尅雙城寄﹕第十八集 點過年 (香港朋友篇第一炮)

雙生雙尅雙城寄﹕第十九集 點過年 (廣東朋友篇第一炮)

第54集 聖誕睇 Die Hard

客席主持﹕肥冼

聖誕節無論成班朋友圍埋開party,定情侶夫婦拍拖,甚至一個人宅在屋企,睇戲都係一個適合的選擇,同聖誕節有關嘅電影有唔少,點解3位主持偏偏抽套<<Die Hard>> 出嚟講呢?因為個故事發生在12月24日,定係有其他原因?

詳細內容請大家留意節目啦,順便祝大家聖誕快樂。


 

 

今集提到的電影包括﹕

  1. <Die Hard>>
  2. <<Taxi Driver>>
  3. <<The Six Sense>>
  4. <<Twelve Monkeys>>
  5. <<Village>>

文化從來沒有投降

有心保護中國文化,絕對唔係一刀切咁防止同其他文化接觸,反而要認真諗諗點做先弘揚到中國文化,你可以話我崇日,不過日本就完美示範咗點發揚自己文化,吸引世人不斷去欣賞同朝聖。記得去年訪問郭子健導演時佢提到﹕「港產片其實係雜種,不中不西」,我好認同導演嘅講法,當年香港嘅電影工作者無劃地為牢,成功地將西方嘅創意結合本地想法,炮製出唔少經典嘅港產片,你可以話佢左抄右抄炒埋一碟,偏偏佢炒得好睇又好賣。其實唔只港產片,茶餐廳嘅菠蘿油紅豆冰火腿湯意粉,或者港式鐵板豉油西餐,都係中西文化混合的「雜種」,偏偏大把人愛其夠雜,睇下幾多遊客嚟到都要食下就知。


見到商場內嘅聖誕佈置,就知呢個普世歡騰嘅節日好快嚟到,可能大家已密鑼緊鼓咁安排節目,只不過最近聽到一股聲音,係提醒中國人要慎過聖誕節,尤其無信基督教嘅朋友,唔應該寫聖誕卡買禮物開派對….總之任何形式嘅慶祝都唔應該參加,目的係保護中國文化,防止文化投降嘅現象出現。其實文化自有其獨立生命,唔會輕易被另一文化吞噬,事實亦證明文化一路以來只有互相融合和影響,從而誕生出新嘅形態。

聖誕節只係一個符號,象徵普天同慶,等大家借呢個機會玩下輕鬆下,紓解下一年落嚟工作嘅勞累同緊張。好似德國人過聖誕節,就同中國人過年差唔多,我表妹幾年前嫁咗畀德國人,每逢聖誕,佢就要同鬼佬表妹夫趕返德國過節,聽佢講除咗幾個大城市有聖誕市集外,聖誕期間好多舖頭都係休息唔做生意,市面一片安詳寧靜,唔同香港咁成街人。平安夜當日,一家人聚埋開派對,大家交換禮物,互相祝賀。到聖誕節正日,會到其他親戚屋企拜訪,情況同中國人去拜年差唔多,係無派利是咁解。我都會趁住聖誕節同家人朋友歡聚﹕平安夜同舊同學打下邊爐,之後玩大富翁傾下偈就一晚﹔正日去親戚到開大食會同玩抽禮物。所謂慶祝聖誕節,講到底係個借口而已。

我個人認為文化只有融入同交流,互相影響後再創新形態。例如佛教由印度傳入中國,千百年來不斷同中國文化融合,跟儒道兩種思想互相影響,最後三者共同影響著中國人的思維。又好似墨西哥嘅亡靈節本來係一個本土節日,經過多年嚟同西班牙殖民時代留落嘅宗教儀式與基督慶典融合,發展成今日嘅形態,而家墨西哥人不論宗教背景或種族,都會慶祝亡靈節。想睇下亡靈節有幾熱鬧,不妨搵套<<007: Spectre>>睇下,電影一開場就係亡靈節嘅盛大巡遊畫面。就算普世歡騰嘅聖誕節,去到世界各地跟唔同風俗文化結合,都誕生出富當地特色嘅新形態。好似聖誕節icon之一嘅聖誕老人,佢派禮物就聽得多,有無諗過佢向人要禮物呢?瑞士嘅聖誕老人就係咁,佢哋多數由窮苦人裝扮,身穿白衫,聯群結隊向富人討禮物及食物。每種文化有獨特嘅生命力,唔會話邊種取代邊種。因此我個人唔認同文化投降嘅講法,再講真係有投降又點,和服係人都知,日本人會叫和服為吳服,相傳係三國時代東吳與日本進行貿易,將絲織品及衣服製作方法傳入日本,從而影響咗日本服裝嘅發展,故和服究其根底係嚟自中國文化,如果文化投降嘅講法成立,到底係日本文化向中國文化投降,定係中國文化反被日本文化侵佔呢?

有心保護中國文化,絕對唔係一刀切咁防止同其他文化接觸,反而要認真諗諗點做先弘揚到中國文化,你可以話我崇日,不過日本就完美示範咗點發揚自己文化,吸引世人不斷去欣賞同朝聖。記得去年訪問郭子健導演時佢提到﹕「港產片其實係雜種,不中不西」,我好認同導演嘅講法,當年香港嘅電影工作者無劃地為牢,成功地將西方嘅創意結合本地想法,炮製出唔少經典嘅港產片,你可以話佢左抄右抄炒埋一碟,偏偏佢炒得好睇又好賣。其實唔只港產片,茶餐廳嘅菠蘿油紅豆冰火腿湯意粉,或者港式鐵板豉油西餐,都係中西文化混合的「雜種」,偏偏大把人愛其夠雜,睇下幾多遊客嚟到都要食下就知。

我認同要慎過聖誕節,不過就唔係打住保護中國文化旗號嘅理由,反而係考慮點安排先玩得開心盡興,唔好浪費年尾呢個攞正牌去玩嘅大節。最後,代表編輯部祝大家聖誕節快樂 (或者聖誕快上)。

P.S :賣個廣告先,編輯部趁住聖誕節,邀請咗一班熱愛創作嘅朋友,以聖誕老人及聖誕禮物為題,創出了一批抵死有趣的作品,借呢個機會請大家睇下開心下,順便祝大家聖誕快樂!! 

聖誕咩都有–聖誕老人新style

聖誕咩都有–怪搞聖誕禮物

聖誕咩都有–怪搞聖誕禮物

在聖誕派對中很多時都有抽禮物的環節,或者是運氣問題,筆者我經常與「好嘢」無緣,試過抽到廁紙、洗潔精、5公斤白米、memo紙,甚至性玩具…..雖然當中都有實用的,但總感覺跟禮物兩字談不上關係….

今年編輯部集合了一班貪玩的朋友玩抽「禮物」,跟普通的抽禮物不同,大家不用花錢花時間去買禮物,反而要挖空心思,提交「產品名」+「關鍵」各一,例如產品是花生油,關鍵字是深綠色。由主編收齊後進行抽籤,中籤的朋友,須按產品名及關鍵字進行創作,設計出一份怪搞抵死的「禮物」。當然,大家提出的產品名及關鍵字多數沒有關聯,故創作時非常考驗聯想力及畫功。

現在請各位看看參加者們在腦洞大開下畫出來的作品,並預祝各位朋友在參加派對時鴻運當頭,抽多點「好嘢」回來。


 

 

鱷魚

鱷魚 創作總監


抽中的產品名及關鍵字﹕絲襪 宿醉

作品簡介﹕

聖誕節,有人收禮物,有人會飲醉,聖誕老人會送你禮物讓你心花怒放,而酒神,就會用絲襪罩住你的頭,等你天花亂墜地過聖誕。