Part 1
Part 2
又係周星馳 (按﹕周星馳電影系列唔講佢講咩？)，今次講兩套以佢在官場經歷 (或者係公堂) 為題的電影，分別是 《審死官》和《九品芝麻官之白面包青天》。
《審死官》，1992年的電影，由杜琪峯執導，周星馳扮演狀師宋世傑，戲內其他角色包括已故的梅豔芳 (飾宋世傑夫人)、吳孟達 (飾廣州知縣何汝大)、吳嘉麗 (飾楊秀珍) 及秦沛 (飾八府巡按) ，而《九品芝麻官之白面包青天》則是1994年的電影，由王晶執導，周星馳的角色為包龍星，聯同已故的吳孟達 (飾包有為)、張敏 (飾戚秦氏)、徐錦江 (飾雷豹)、鄒兆龍 (飾常威) 、黃一山 (飾同治皇帝)及苑瓊丹 (飾三姑) 等人攜手演出。兩套電影，都以清朝為背景，公堂對簿為題，具體劇情唔多介紹，未睇過的朋友得閒去睇下，睇過的朋友不妨一睇再睇。
兩套電影都有唔少笑位，娛樂性十足，尤其《九品芝麻官之白面包青天》笑位就更多。不過細味之下，《審死官》係比較發人深省，宋世傑在戲內係個金牙大狀，由他辯護的犯人，那怕本來有罪，最後都一定獲判無罪，佢亦自然因此賺得盤滿砵滿，在呢種人設下，宋世傑好多時要爭昧着良心去打官司，那怕客人本是罪有應得，但受人錢財替人消災，都要盡力替對方脫罪。亦可能因為咁而作孽太多，宋世傑夫婦雖然有很多孩子，卻無一個能夠養大，全部早早夭折，難道真係有報應？ 而宋世傑又是否真係一個為咗錢，而放棄良心之人？
除此之外，戲內好多場口，都深諳人與人相處之道，例如宋世傑與何汝大初次見面，彼此熱情客套，大有相見恨晚之感，實際上兩人早已在背後暗地交手，恨不得早日擊潰對手。呢種職場上相見時的客套表現，可能好多人覺得虛偽，不屑為之，不過呢種禮儀又確實係必需，因為今日職場上的對手，他日可能係你拍檔，甚至重要的客人，今日的關係只係一時而不是永恆，所謂今日留一線，日後好相見。
唔多廢話，都係果句，更多精彩內容，請聽今集。
