標籤:返工

為何要返工? (2)

始終在屋企做嘢,辦公時間隨著環境的改變而變得模糊 (雖則在辦公室可能都模糊,但起碼一踏出公司門口已叫放咗工),結果本來是朝9晚6 的辦公時間,隨時變成on call 36小時


在屋企返工當然爽,不用一早起身逼車逼地鐵,又慳到唔少車錢。計計下,如果慳到過去果十幾年的返工車費,可能夠我畀首期買樓。故上篇講在屋企辦公的編者話,不少朋友讀後也紛紛表示讚同。

打工仔固然享受在家辦公,不過凡事有利就有弊。在家中工作,老細們經常見你唔到,會否思疑你3點3去嘆個茶餐,嘆到4點3買埋餸先返呢。在屋企返工,老闆或同事們可隨時透過各種通訊工具聯絡你,這可能形成一個情況,就是一想到有事就立即call你,卻忘了原來你都有放工時間。始終在屋企做嘢,辦公時間隨著環境的改變而變得模糊 (雖則在辦公室可能都模糊,但起碼一踏出公司門口已叫放咗工),結果本來是朝9晚6 的辦公時間,隨時變成on call 36小時,間唔時傳媒都有講,打工仔最討厭老闆們的十大行為之一就係放工後仍然whatsapp問三問四,在屋企做嘢就有可能加劇呢個情況。

自去年創業,我就正式開始在家工作的日子,表面睇係幾正幾自在,當大家都在趕返工趕到甩頭甩髻時,我只要行3步就由睡房過到書房開工。只是大概2個月後,每朝只剩下自己一個在家,再想到樓上樓下人人都去返工時,就覺得自己好似無咩用,尤其生意淡薄時,感覺更加明顯。消除這種感覺的方法是早起,好多朋友都跟我講過同一番話:你做自己嘢,瞓到幾點起身都得啦。我的答案是應該比你晏,不過一定不會遲過8點,瞓到自然醒梗係爽,只是太晚起床,覺得自己無用的感覺會更強烈,因為只有無嘢做的人先可以瞓到想幾時醒就幾時醒。我堅持早起,看看早晨的陽光,甚至落去樓下花園走兩個圈,9點前準時坐到電腦前開始工作。這點很重要,因為客戶們一般都是9點開工,我一定要配合他們的工作節奏,我甚至試過早到8點9就收到客的電話,問我批貨能否如期到香港,如果我當時仍跟周公吹水的話,就肯定得失個客了。老實講,就算9點坐埋電腦旁,都不一定立即有工作,不過我盡量堅持這個動作,令自己進入作戰狀態,以應付隨時發生的狀況。  8點或之前起身是平時的指定動作,不過凡事都有例外。就像今年的世界盃,睇完幾場夜波,我都瞓到第二日差不多11點才起床。作為球迷豈能錯過這4年一度的盛事,就算唔睇足64場,都揀到至少4至6場睇,而且這是搬出來住後經歷的第一個大賽年,約埋朋友們睇波開心下就少不免。可能你會覺得我雙重標準,一時話要早起,轉頭為睇波又可以瞓晏D。這不是雙重標準,打自己工最重要的一點是安排工作的先後次序,例如法國對烏拉圭的8強戰,比賽在晚上12時結束,另一場的巴西對比利時在晚上2時開賽,這兩個鐘頭間太太及朋友們都去了睡覺休息,我卻跟髒神在開電話會,傾到差不多1點9先收線,之後洗個面,沖壺茶,剛好叫醒大家睇波。

關於時間的安排,其實上期都有講過下,今次就講多少少,在屋企返工,只要完成任務,無人會理你如何運用時間,尤其我呢種打自己工,彈性就更大。記得今年年頭有幾日都幾凍,果幾日我日間就優先處理客戶的查詢,留下一些事務性的工作,然後去街市買定食材,夜晚同老婆打邊爐,記得4點幾去到街市,見到除咗賣魚佬同豬肉佬外,其他都係女人,可能她們會想這個麻甩仔一定係失業人士,先會呢個時間來買餸,我就開心話之你,買完快快手返屋企準備晚餐,食飽後再處理未完成的事務性工作。

唔覺唔覺又一篇,憑個人經驗,在家返工只適合某些自我約束力強的人,畢竟球員係你,球證又係你,如果不能好好約束自己,就很易受到不同的誘惑干擾到工作效率。關於在家返工這個話題還有好多事可以傾,不過我都係時候約束下自己,先做埋手上其他工作,今次講住咁多先,如果大家有什麼想法,歡迎與我們交流,有機會再跟大家傾過。

 

相關話題

為何要返工?

造夢與做人

為何要返工?

現在很多工作都是通過電子平台進行,只要有電腦或手機,其實在家中辦公或在公司工作也沒分別,故對某些工種來說,返工是否多餘呢?


現在很多工作都是通過電子平台進行,只要有電腦或手機,其實在家中辦公或在公司工作也沒分別,故對某些工種來說,返工是否多餘呢?在家辦公是否一個更好的選擇呢?當然有些行業並不適合在家工作,例如飲食業、零售業及紀律部隊。

無論坐3小時巴士或1小時地鐵甚至是行5分鐘路,我們都必須採取物理移動的手段,把自己的肉身送到公司。在逼車逼地鐵返工的日子,有位坐是幸運,不過通常這些機會都不是屬於我的。成車人逼在一起,晨早流流就要受到高傲潔牙膏理斯特菌漱口水棟篤企髮泥加幾十隻香水混和出來的氣味侵襲,偏偏逼在車廂內又無路可逃。科技幫助我們打破了地域的界限,既然可以在家辦公,我們又何需每朝早逼車逼地鐵逼到裙拉褲甩地去返工呢?把慳回的車錢去嘆個靚早餐,作為美好一天的開始不是更實在嗎?

講開裙拉褲甩,返工必須有相應的打扮,我知道好多公司已接受比較輕鬆隨意的服飾,不過總不成穿著在家中的便服上班,就算公司不介意,自己都覺失禮。故我們需要為返工而置裝,根據2017年尾香港政府發表的調查報告,香港現時有365萬勞動人口,當其中一半是男士,他們有一半人需要穿西裝上班,都約92萬人,當他們需要5套西裝作替換,那就需要460萬套西裝,況且還有女士那筆未計,生產製作這些「返工衫」,需要消耗多少地球資源呢?在家辦公的話,話之你穿睡衣或全裸也無人在乎 (如果有家人在著返件衫),慳回置裝費,又減少地球資源的消耗,完全符合現今環保的大趨勢。

著睡衣或全裸都好,在家就是無拘無束,只要工作安排妥當,就有很大的自由度去做其他事,以午飯為例,幾時食想點食完全自己話事,貪方便可以出街食,講健康可以自己落廚。至於工作期間,只要確保不出差錯,光明正大地偷懶絕無人詐型,話之你上面書或搶機票,都無需左顧右盼怕被人發現 (可能你根本不怕被人發現),甚至中間偷點時間去洗衫買餸或湊仔都無問題。部份老闆或上司,覺得員工準時收工就是懶,或者員工自己有心魔,擔心準時收工會背後被人講閒話,自這種無形的壓力令打工仔到了放工時間,手頭上無其他工作,仍選擇留在公司「扮工」。在家辦公,目標為本,做完就收工,無須浪費時間「扮工」。

「返工」的概念由來已久,要從根本性改變這個想法,當中仍然有很多問題需要思考及討論。如果大家有什麼想法,歡迎向我們發表下意見。因篇幅所限,今次的討論就暫告一段落,有機會再跟大家交流交流。

相關話題﹕

打掃

為何要返工? (2)