過去幾個月，感覺比電影劇本更超現實，過往只在電影中見到的情節，現在全部跳出大銀幕在現實上演﹕人類最初輕視的疫症突然來襲，失控中的社會人人分分秒秒都在跟死亡打交道，不幸離世者留下了悲傷和遺憾，在生的每日飽受不安與苦悶的煎熬…..

從今次疫情我感受到風水輪流轉中「轉」字的真諦，很多過往以為理所當然的事，變得並非必然。 一直以來，大家都偏愛排長龍的人氣食店，現在反而多留心一些以前無留意的食店，正正貪其較少人幫襯，得小貓三四隻，感覺上安全得多。打工仔普遍都望放假，然而早前在街上，無意中聽到一位哥仔講電話﹕「重講放假，放咗成個月重唔夠呀…….我而家勁想返工囉，X你…….有錢放假就爽，而家無錢呀…….日日燒錢，再咁搞等仆街啦…..」。換著以前，這種情況未必說沒有，但在今時今日這個環境，普遍打工仔都希望有工返多過放假。

疫情起於亞洲，當時歐美部份人認為疫情不會傳到當地，故無作準備，掉以輕心的結果就是不到兩個月時間，同樣的劇情在歐美上演。人好多時喜歡批評人，其實試試站在對方立場，批評的說話就可能會立即收回肚中。某些國家採用了被評為「唔人道」和「唔自由」的強力措施去壓止病毒傳播，封城封路封村樣樣有。到病毒傳播到世界各地後，各國終於以強制隔離的措施去截斷病毒傳播。批評人容易，到自己落手落腳做時就知難，有時倒轉立場去考量，很自然明白對方為何有此舉動。

疫情肆虐，全球受累。然而凡事有兩面，今次全世界付出了慘重代價，不過也是個契機，讓我們拆走思想上的籬巴，剔除過去一些以為牢不可破的想法，容納從未考量過的事情。疫情只是一時，偏見是一世，如果大家在這段時間去跳出偏見，做人更寬容，相信疫情過後，生活會變得更美好。

相關內容﹕總會復活

「終於有番多啲戲可以揀」朋友阿傑嘆道。早前<<復仇者聯盟4>>上畫時，間間戲院差不多由朝播到晚，阿傑大呻無哂選擇。隨住<<復仇者聯盟4>> 熱潮佔退，鍾意入戲院睇戲嘅佢覺得一天光哂。其實有無<<復仇者聯盟4>>，戲院可供選擇的電影係唔多，再放大點睇，我哋的精神食糧好多時係被人篩選過、隔過渣。

打開各大戲院的網站，望落有唔少電影可以選擇，只係世上咁多電影，戲院內放映的只屬冰山一角，而且來源都幾狹窄，主要係荷里活的製作，夾雜部份中日韓電影，加埋港產片，很多產自其他地方的電影我哋都無法在戲院睇到，舉個例，<<關原之戰>>，一套2017年的電影，內容講述一場決定了日本歷史走向的戰爭，套戲我好想睇，可惜香港無上畫，反而台灣有。至於話來自俄羅斯丹麥巴西瑞典….甚至產自非洲的電影，香港的戲院唔多覺有。可能好多人覺得我打橫嚟講，香港有幾多人對上述地方的電影感興趣呢？我承認對此感興趣的人應該唔夠填滿海運戲院，但如果講到有絕對的選擇自由，係咪應該包羅萬有，而唔係只按市場標準去做篩選，揀過揀剩先畀我哋呢？

其實唔只電影，在香港，無論電視或雜誌，我們也沒什麼選擇自由，電視方面，只從永恒的亞視執笠後 (近年轉為網上電視)，一台獨大的情況愈趨嚴重，想播咩就播咩，每晚黃金時段就是劇集劇集劇集，唔係話劇集唔好，都唔駛星期一播到星期七。每套劇的套路又來來去去差不多。記得細時睇劇好多過癮題材，好似講中國古代刺客的<<大刺客>>、講個傻佬要搞馬場的<<馬場大亨>>，講奇幻的<<大頭綠衣鬥殭屍>>，今日睇返，呢啲劇集製作未必係上乘，重可能有啲粗糙，但起碼橋段過癮，唔似而家唔係爭產就爭仔爭女，睇到人心煩。

行去報攤，雜誌看似選擇唔少，不過細心留意，好多唔係講炒股投資，就係吃喝玩樂，或者以尖酸刻薄、極盡挖苦的手法去爆名人明星的私隱，唔睇雜誌名，本本差不多。想睇比較有深度的文史哲內容，本地雜誌係無咩選擇。

「以為自己有得揀，原來係啲賣剩橙」。其實唔駛咁灰，法國國民公會宣言講過﹕「自由不是想做什麼，就做什麼；自由是教你不想做什麼，就可以不做什麼。」戲院電視台雜誌社在製作或選取內容時有市場考量，始終營運要成本，總無可能同錢作對，專走偏鋒。只係作為觀眾，我哋有權say no，事實好多人都做到，睇下重有幾多人睇大台咪知囉。更重要係我哋可以去尋找和開拓新渠道，前文講到的<<關原之戰>>，最後我在影碟舖訂咗隻台灣版，安坐家中一樣睇得過癮。識得揀，世上還有很多選擇，無必要畫地為牢，限死自己。當然要學識點揀係另一門學問，有機會先同大家分享了。

朋友阿強話睇完近幾期以置業為題的編者話後有啲意見，佢認為香港樓貴到痴線，已經唔係人買 (唔通買家唔係人…….其實係為人父母)。阿強又話﹕「香港社會問題多多，由上至政府施政失誤連連，下到社會氛圍怨氣連天，香港已經唔適合人住，就算有錢都唔應該買樓，用嚟移民到其他國家好過。佢重話，同樣揸住五百萬，香港最多買得果幾百尺樓，台灣可以買千幾二千尺，生活壓力又無咁大。留在香港，日日受折磨，返工做餐死都係得雞碎咁多人工。作為納稅人，福利無自己份，就益哂班新移民….」。佢一口氣講出諸多不滿，最後講咗句﹕「有得走我一定走」。

講到移民，可能大家第一時間諗到八十年代到九十年代初的移民潮，好多人移去加拿大。當時好多香港人擔心回歸後的社會狀況，都選擇咗移民。其實香港人同移民幾有緣，因為香港本身就係一個由移民組成的社會，早到抗日戰爭及國共內戰時，已經有大量國內的人為逃避戰火而走難到香港。到文化大革命時，又有大量難民由國內偷渡到香港定居，單係呢兩次移民潮已為香港帶來三百萬人，當而家香港有八百萬人，即係接近一半人係呢批移民的第二代甚至第三代，我就係其中一人，我阿爺阿公阿婆都係抗日時期走難到香港。

香港人邊到有錢搵到就去邊到安居樂業，其實移民與否無咩所謂，每個人有權選擇自己的生活方式，不過有部份香港人幾雙重標準，自己移民無問題，但好歧視新移民，電影<<富貴再逼人>>中驃叔兩公婆搭地鐵的一幕就好描寫到呢類人的心態，驃叔兩公婆移民加拿大後，返到香港坐地鐵時，遇到一車異地人，有中國人越南人菲律賓人，驃叔一臉不屑，覺得佢哋霸佔香港，同而家有人覺得新移民嚟香港搶飯碗搶福利，係蠶食香港的蝗蟲，係破壞香港的賤精的想法無分別。有呢種想法的人有無諗過，自己上兩代可能都係新移民？自己有咩本錢去歧視人？你話以前還以前，咁講返而家，我哋移民到彼邦，在外國人眼中我哋都係新移民，如果人哋歧視我哋，話我哋去到剝奪當地人資源又點？要知道好多香港人，尤其係早年移民那批，好多無一技之長，去到外國隨時「洗大餅」，外國人一樣可以認為這些「新移民」係同本土基層人士爭飯碗。

我無意為新移民講說話，只不過想請大家諗清楚移民的目的，無論咩年代或種族，移民只係想尋求一個更好的生活環境，我哋有權去他國尋找幸福，何解就嫌棄他人去香港生活？新移民有問題，我哋要做的係檢視移民政策，而唔係單單討伐新移民。好多人講到香港民不聊生，唔走唔得，唔該認真睇下新聞，幾多戰亂頻仍的國家，果啲地方就真係民不聊生。我就唔會移民，香港係我屋企，或者佢今日真係亂咗，亂咪執返好，無人會因為間屋亂而選擇搬屋啩。

各位朋友如果好似阿強咁有任何意見，歡迎隨時聯絡我，大家交流交流。

相關文章

急住買樓定買債

有樓有成就？

「等咗十年，點解我咁衝動，點解唔等多陣呢….」

故事係咁，阿仁為咗排公屋，一直拒絕老闆升職的安排，以免入息超出申請資格。最近老闆又舊事重提，阿仁見等咁耐都排唔到佢，就決定接受老闆好意，命運呢個時候同佢開咗個玩笑，阿仁升職3個月後收到通知，終於排到苦等多年的公屋，奈何佢入息水平已超過限額，已無入住資格。

雖然心底覺得阿仁好無志氣，為咗間公屋多年來放棄升職加薪的機會，如果佢一早升職，今日故事可能已經改寫，但見佢咁無癮就無謂再刺激佢。況且細心諗，就算佢升職，人工加得幾多？當佢加得3000蚊，而家一個人租間劏房，最平當5000蚊，加薪幅度都唔夠佢租間劏房。相反輪到公屋的話，月租千幾二千蚊，呢個租金佢應付到有突，兼居住環境一定好過劏房，故可以話阿仁無志氣，不過在居所難覓的今日，佢咁做又無可厚非。

阿仁件事，證明了制度對人的誘惑，制度本來的目的係確保社會有序，有序方令社會更公平，只係人有時為了從制度中獲益，而扭曲了本來應做的行為，久而久之，會反過來埋怨制度的不公。還記得幾年前，我在某報館做分類廣告sales，晚晚8點幾9點放工，逢星期五人哋享受小周末時，我就要捱到夜晚10點幾甚至1點先走得，唔知重以為我好多嘢做，實情是齋坐等收工。

剛入職時上司對我講﹕「我哋主力唔係搵新生意，只要keep住現有嘅客，填滿每日嘅廣告窿位就得」公司每日有最低要求的廣告量，當係20頁紙咁講，通常公司會開夠24或28頁，公司想做多啲生意係無可厚非。去到呢到，要橫叉一筆，講下公司的佣金制度，係行公佣制，要營業額達到某個標準先有佣分，只係如某位師姐所講，那個營業額的高度比ICC更高，就算佢做咗差不多廿年，都從未試過分佣。

每日只要填滿啲窿就可以收工，不過同事們習慣晚上7點後先入稿，新入職的我感到好奇怪，點解唔快手搞掂收工呢？之前提過，公司每日有基本的廣告量要求，其實同事們心知要湊齊20頁廣告已唔容易，更莫講話填滿24頁或更多頁。況且太早入稿，公司見你咁易追到，就會開多幾頁畀你繼續追，既然做多無佣分兼又要辛苦自己，同事們自然唔會搏，但求滿足基本要求就算數。方法係用時間換空間，每份報紙都有指定開機印刷時間，當接近赴印時，公司見廣告量唔夠就會收手，減少出紙數，意味大家可以交少啲貨。因此同事們會有默契地「袋住先」，有稿在手也不入，大家透過通訊群組夾定時間才一齊入稿。其實公司早知有此情況，但就無做檢討和改變，如是者每日返工就係玩拖時間遊戲，結果公司和同事們都係輸家，站在公司角度，我哋成班人齋坐，耗費公司資源又無生產力。站在同事角度講，當一晚白坐兩個鐘，一星期返五日工，一個月就白坐40個鐘，40個鐘我當去睇戲都睇到十幾廿套啦。

嗰段日子我體會到何謂上有政策，下有對策，每版報紙設定印刷時間，原意係令每個部門可以睇時間有系統地安排工作，結果這個時間死線卻成為了同事們減少交廣告稿的護身符。在日常生活中，好多時我哋批評社會有好多不公的制度，只係批評之前，我哋可否稍稍靜落嚟，諗諗究竟係制度問題，定係設計制度本身的人的問題呢。

相關文章

急住買樓定買債

有樓有成就？

香港樓出名貴，原因有好多，例如之前探討過取消租管，令租樓同供樓的支出差唔多，出名識計數的香港人自然傾向買樓，供樓當儲錢，好過交租益業主。又有一個講法係國內客炒貴哂啲樓。當然近排講得最多係土地問題，無地起樓，樓價想唔貴都難。除咗經濟因素外，個人思想的改變，可能都係推高樓價的原因。我今年三十幾歲，發覺同我差唔多年紀的人，都唔多想同父母住，我的父母輩係無呢種諗法，可能我哋呢代的DNA發生突變啦。只係當人人想要自己的居所時，樓價自然愈搶愈高。

樓價高企，好多人覺得置業無望，社會慢慢出現咗以前無的現象，開始有人覺得買到樓係成功人生的指標，多得有心的傳媒大力炒作，好似有節目邀請一班不同社會背景的人，講下在樓價高企的今日佢哋為置業如何各出奇招，當中更針對性講到佢哋對置業的心態，唔少人覺得呢類節目嘩眾取寵，但亦唔排除有人受到影響。記得幾年前同合作開的印刷佬食飯，講開我買樓準備結婚，佢即時話﹕「叻仔，今時今日唔駛靠老豆老母，自己上到車。」印刷佬年紀做得我老豆，平時做嘢總帶住幾分長輩對晚輩的態度，自從知道我買樓後，感覺到佢態度係有唔同，多咗份之前無的敬意。印刷佬的反應係一個例子，有長輩和朋友知道我買樓後，態度都有改變，雖未去到前倨後恭，但多咗份之前無的尊重，特別係年紀比我細的朋友，佢哋覺得今時今日買到樓係一個成就，會覺得我已經上咗岸唔駛憂。

好多人覺得買到樓係有錢的表現，我明白大家點解咁諗，香港人太習慣睇錢做人，社會風氣好多時以錢去衡量一個人的成就，只要你有錢，你就係叻人，套用到買樓上，無論你係在今日瘋狂的樓市下置業，或者早前買落也好，都證明你有一定的財政實力，在香港社會凡事講錢的標準裏，你已是成功人士﹐只係作為過來人，我好誠懇同你講，買到樓唔等如有錢，買到樓只係借咗錢，重要係借咗好多錢，要還廿幾三十年，如果真係有錢就一炮過，邊駛問銀行借。

相關文章

家是生活的博物館

地從何來

自主前，請先自理

急住買樓定買債

香港樓價貴絕全球，至於有幾貴，我唔係專家亦無數據分析，只能從自身經驗去講下，我4年前以四百萬買入現在的單位，4年後的今日已升至差不多六百萬，即是每年升幅約五十萬港紙。以前話買磚頭保值，而家買磚頭直頭升值，重要係你咩都唔駛做，就自然好似坐火箭咁升，都咪話唔神奇。

同髒神吹水時有傾下樓價高的現象，好多人話係土地問題。不過佢老人家就覺得係取消了租金管制的問題。有租管時，私人住宅的業主加租每兩年最多加你30%，不過自97年亞洲金融風暴後，政府為提振跌到殘的樓市而在98年取消了租管，從此業主加租再無限制，50%、100%，鍾意加夠200%亦可以。我有朋友租樓住，因為加租幅度大，每兩年搬一次，故他的家當盡量從簡，平時唔敢買太多嘢，怕搬屋時執餐死，就算租到新屋，好多家當亦懶得拆封，免得下次搬時再執。他的遭遇可能係唔少香港租客的縮影。1998年距離而家都十幾年，其實政府應否考慮重置租管呢？畢竟有租管時，租務市場與置業市場是分開的，你可以邊租屋邊打算，生活環境也不會因為大幅度加租而受影響，到有錢先考慮置業。

我認同髒神的睇法，記得細時的親戚係租樓住多，大家見面亦好少講買樓。就算買都要左計右計，人人話今日置業難，以前置業都唔係易事。聽長輩講，80年代買層幾百呎的樓幾十萬可以有交易，在今日睇呢個當然唔係咩大數目，只係放回以前的人工，我阿媽做工廠賺得果二千幾蚊一個月，幾十萬樓價就係天文數字。而以前買樓的息口係十幾厘計，絕非今日的低息可比，故話今日買樓難，以前一樣無咁易。正因為買樓唔易，故以前的人唔急住買，到今日買樓難度依舊，反而唔少人心急要做業主，尤其好多後生仔，一出社會做嘢就講要置業，有必要咁急嗎？ 我認為同傳媒有多少關係，而家好興講個人空間，只要可以自成一角，再細的空間都無問題。記得未興劏房前，係講住板間房，其實兩者的尺寸係差不多，不同地方係板間房無獨立廚廁，需要幾戶人共用廁所及廚房，故住客們需要互相遷就，呢個居住環境話無拗撬就假，不過亦肯定有相處融洽的例子，細時睇電視劇都見唔少呢類橋段，幾戶人住板間房，食飯時一齊出大廳食，之後坐埋一齊睇電視吹水，都幾熱鬧。反觀而家的劏房，各種劏法都有，最正莫過於廁所上面係床。住呢種劏房個人空間係有，不過代價係隨時聞到屎味，到底值定唔值呢？

樓價升幅快過眨眼，我明白好多人擔心今日唔買，明日只會更貴，故寧可有買貴無買錯。我唔反對置業，只要自己能力應付到，在今日呢個環境，有自己物業始終勝過去租樓。只係眼見好多能力不足的人，急於衝入樓市，咁絕對係一個危機。「成功靠父幹」，唔少人特別係後生仔，在父母的支持下成功上車，父母愛鍚仔女的心無須質疑，只見佢哋一係加按自己的物業，或者攞養老金出來幫仔女支付首期就知。問題係供樓最重要係咩？一個穩定的工作環境及收入，以應付廿幾甚至三十年的按揭還款，還款係每個月還，唔會有假期畀你抖下。我無意貶低後生仔，只係好多後生仔剛出社會工作，職業生涯隨時有變，連帶影響收入。當經濟狀況出問題時，難道去向父母求救？佢哋又救得多少次呢？父母在出手幫仔女上車前，應否三思送給仔女的既是個安樂窩，同時是條長命債呢？

相關文章

家是生活的博物館

地從何來

自主前，請先自理

「年廿八，洗邋遢」，對我嚟講就無咩好洗，因為我每星期都會大洗屋企一次，抹塵拖地洗廁所，故屋企污糟極有限。講到邋遢，令我諗起部份朋友，搬出嚟自住後先發覺自己無咩自理能力，搞到屋企立立亂，到底呢個係普遍現象，定只係我身邊的朋友係咁，就有待各位證實一下。

話說早排舊同學A小姐新屋入伙，邀請我哋上去玩下，A小姐一向鍾意小動物，搬出嚟住後，當然帶埋佢隻狗阿木，再養多三隻兔仔。當日一入屋已聞到一陣難頂臭味，似係屎加動物身上的騷味混和的氣味，只見跟我同行的太太及另外兩位同學，都露出跟我同樣的表情，就知道唔係我個鼻有問題。到坐低後，見到地磚隙縫間有著薄薄的啡色，應該係乾咗的屎，真係忍唔住問A小姐﹕「喂，你新屋入伙無耐，咁快搞到間屋咁嘅」佢答﹕「我都唔想，以前同阿媽住，所有家務佢搞掂，打掃清潔從來唔駛我做，間中連狗都幫我放埋，而家自己一個住，先發覺原來好多家務要做，初頭都有心機執下屋，幫阿木佢哋沖涼。後來無咩心機搞，放工返嚟好攰，就算想搞都有心無力，或者諗住放假先一次過搞，到放假又想出去玩下鬆下，積積下就搞成咁，唔慣都要慣。」

A小姐的例子可能就極端咗，只係諗深一層，好多80後或90後好嚮往搬出來，覺得有自己天地好過癮，似乎無考慮到自己住後，有好多家頭細務要處理，包括我在內，唔少朋友搬出嚟後，發覺無咗阿媽幫手執頭執尾係一件好大鑊的事，一間屋，除咗清潔打掃，重有好多雜務要處理，例如幾耐開一次機洗衫，初搬出嚟時試過懶洗衫，搞到差啲搞到無衫換。又好似去超市補倉，以前老媽定時定候去入貨，想飲汽水打開個雪櫃就有。而家自己住，想飲就自己去買，去買前重要檢查下有咩日用品有缺，一次過買齊，否則要用時發覺無先買就好麻煩，試過老婆煮煮下飯先知無豉油，我即刻衝去買，一來一回，最後成餐飯遲咗半個鐘先有得食……重有其他林林總總的雜務就唔多講。雖然呢啲雜務唔係咩複雜難解的問題，但每樣加加埋埋都要一定時間去處理，以前同屋企住，星期六日就係放假，而家的星期六日要抽時間處理家務瑣事，老實講係好麻煩，因此我有唔少朋友索性唔理，忍得就忍，只係我有潔癖，唔執過唔到自己果關。其實我都有妥協的地方，好似對食方面我係個幾麻煩的人，想食得好最好自己煮，只係我實在分唔到身，故只能將就下，肚餓就出街食，我明白出街食得多係無益，不過真係兼顧唔到咁多。

 未搬出嚟住前，覺得經營一頭家有幾難，到真正自住後先發覺無咁易，因為身邊已少咗個自細默默幫我哋完成所有家務的人。

見到商場內嘅聖誕佈置，就知呢個普世歡騰嘅節日好快嚟到，可能大家已密鑼緊鼓咁安排節目，只不過最近聽到一股聲音，係提醒中國人要慎過聖誕節，尤其無信基督教嘅朋友，唔應該寫聖誕卡買禮物開派對….總之任何形式嘅慶祝都唔應該參加，目的係保護中國文化，防止文化投降嘅現象出現。其實文化自有其獨立生命，唔會輕易被另一文化吞噬，事實亦證明文化一路以來只有互相融合和影響，從而誕生出新嘅形態。

聖誕節只係一個符號，象徵普天同慶，等大家借呢個機會玩下輕鬆下，紓解下一年落嚟工作嘅勞累同緊張。好似德國人過聖誕節，就同中國人過年差唔多，我表妹幾年前嫁咗畀德國人，每逢聖誕，佢就要同鬼佬表妹夫趕返德國過節，聽佢講除咗幾個大城市有聖誕市集外，聖誕期間好多舖頭都係休息唔做生意，市面一片安詳寧靜，唔同香港咁成街人。平安夜當日，一家人聚埋開派對，大家交換禮物，互相祝賀。到聖誕節正日，會到其他親戚屋企拜訪，情況同中國人去拜年差唔多，係無派利是咁解。我都會趁住聖誕節同家人朋友歡聚﹕平安夜同舊同學打下邊爐，之後玩大富翁傾下偈就一晚﹔正日去親戚到開大食會同玩抽禮物。所謂慶祝聖誕節，講到底係個借口而已。

我個人認為文化只有融入同交流，互相影響後再創新形態。例如佛教由印度傳入中國，千百年來不斷同中國文化融合，跟儒道兩種思想互相影響，最後三者共同影響著中國人的思維。又好似墨西哥嘅亡靈節本來係一個本土節日，經過多年嚟同西班牙殖民時代留落嘅宗教儀式與基督慶典融合，發展成今日嘅形態，而家墨西哥人不論宗教背景或種族，都會慶祝亡靈節。想睇下亡靈節有幾熱鬧，不妨搵套<<007: Spectre>>睇下，電影一開場就係亡靈節嘅盛大巡遊畫面。就算普世歡騰嘅聖誕節，去到世界各地跟唔同風俗文化結合，都誕生出富當地特色嘅新形態。好似聖誕節icon之一嘅聖誕老人，佢派禮物就聽得多，有無諗過佢向人要禮物呢？瑞士嘅聖誕老人就係咁，佢哋多數由窮苦人裝扮，身穿白衫，聯群結隊向富人討禮物及食物。每種文化有獨特嘅生命力，唔會話邊種取代邊種。因此我個人唔認同文化投降嘅講法，再講真係有投降又點，和服係人都知，日本人會叫和服為吳服，相傳係三國時代東吳與日本進行貿易，將絲織品及衣服製作方法傳入日本，從而影響咗日本服裝嘅發展，故和服究其根底係嚟自中國文化，如果文化投降嘅講法成立，到底係日本文化向中國文化投降，定係中國文化反被日本文化侵佔呢？

有心保護中國文化，絕對唔係一刀切咁防止同其他文化接觸，反而要認真諗諗點做先弘揚到中國文化，你可以話我崇日，不過日本就完美示範咗點發揚自己文化，吸引世人不斷去欣賞同朝聖。記得去年訪問郭子健導演時佢提到﹕「港產片其實係雜種，不中不西」，我好認同導演嘅講法，當年香港嘅電影工作者無劃地為牢，成功地將西方嘅創意結合本地想法，炮製出唔少經典嘅港產片，你可以話佢左抄右抄炒埋一碟，偏偏佢炒得好睇又好賣。其實唔只港產片，茶餐廳嘅菠蘿油紅豆冰火腿湯意粉，或者港式鐵板豉油西餐，都係中西文化混合的「雜種」，偏偏大把人愛其夠雜，睇下幾多遊客嚟到都要食下就知。

我認同要慎過聖誕節，不過就唔係打住保護中國文化旗號嘅理由，反而係考慮點安排先玩得開心盡興，唔好浪費年尾呢個攞正牌去玩嘅大節。最後，代表編輯部祝大家聖誕節快樂 (或者聖誕快上)。

P.S :賣個廣告先，編輯部趁住聖誕節，邀請咗一班熱愛創作嘅朋友，以聖誕老人及聖誕禮物為題，創出了一批抵死有趣的作品，借呢個機會請大家睇下開心下，順便祝大家聖誕快樂!! 

聖誕咩都有–聖誕老人新style

聖誕咩都有–怪搞聖誕禮物

同髒神夾住做嘢經常有爭執，無論生意或創作上，好多時佢否決我某啲決定或想法時，都指出我有「我覺得係就係」嘅問題，通常佢一咁講我就扯火，我梗係咁諗先同你講啦，唔係講嚟做咩，在情緒主導下，個焦點就轉咗去討論我點諗嘢嘅思路上，莫視咗本身要討論嘅事情。

「做人無須要在乎其他人嘅諗法，最緊要係堅持做返自己」喺傳媒大力渲染下，呢種想法逐漸滲入到大眾嘅骨髓，有堅持唔係唔好，只係當堅持變成固執，完全聽唔入其他人嘅講法時，做人就會流於偏頗。或者大家有類似經驗﹕面對一啲有佢講無人講嘅人係幾頭痛同煩厭，佢哋永遠覺得自己講嘅係不容挑戰嘅真理，寸步不讓。好似社會上一班成日將公義掛喺口邊嘅人，維護公義無問題，不過一定要按佢哋個標準做，因為佢講嘅係真理，其他人講就係歪理，故一項都不能改，在大是大非或原則性上嘅事係有絕對標準，只係落到具體執行上，係咪真係有絕對標準呢？以民主國度自詡嘅美國，個總統選舉制度係咪一人一票嘅絕對民主？特朗普當選已經畀咗個示範大家睇。又以懲治毒犯為例，有啲國家無情講，一定判死刑，甚至菲律賓總統早兩年時曾批准警察在捉拿毒犯時，如發覺有嫌疑，可以當場開槍射殺。有啲國家就選擇將毒犯判監，刑期視乎嚴重程度而定。上面嘅處罰方式令犯毒者得到應有懲罰，無話邊種最恰當。

堅持唔等如不變，適時聽下人講，自己再細心思考同消化下，合用嘅就用嚟改進下自己，無損個人堅持，諗過度過真係唔啱駛咪當聽下囉。條條大路通羅馬，做人太過一根筋，拘泥於自己嗰套，食檸檬嘅往往係自己，因為你堅持時人堅持，所以你永遠不會獲他人接納，畢竟世事無絕對，只有真情趣。

大家常去嘅東京，係當年德川家康轉封江戶後，以愚公移山嘅精神去填海造地，改變河道，先打好發展基礎，可見不論古今，做人最緊要係有片立足之地。今日在香港，很多人已無立足之地，高球場、棕地、改建廠廈和什麼人工島，無論你好邊味，「地」也不能快到聽日就畀到你。

講到地從何來，成日聽到話收返粉嶺個高球場做住宅用地，我唔打高球，亦覺得打呢種波係好扮嘢，只係大家將公義掛在口邊時，點解容不下一個球場畀人打波消遣？因為球場用家多數係有錢人就必須收回起樓？咁收回球場是否打擊權貴嘅象徵意義大過實際意義呢？如果話高球場係浪費土地，咁應該一視同仁，康文署轄下4個高球場都要全數收回改建住宅。況且講到話高球場佔去唔少地皮，其實全港重有唔少網球場籃球場足球場…點解唔攞返去起樓呢？定係所有唔係富貴人家玩意，就可另作別論？

講到棕地，棕地業權同佢個位置一樣都係散散碎碎，單係同業權人傾收地條件都有排傾。就算收得齊，都要花一輪功夫將散佈唔同地區嘅棕地整合成為可發展地皮，先唔講時間，由收地到整合工程，當中涉及嘅金額係咪真係平得過填海做地呢？ (據新聞講填海做地尺價為 HK$1300至HK$1500)。香港地，人人返工唔係返九龍就係香港島，即係銅鑼灣灣仔金鐘中環尖沙咀佐敦旺角官塘九龍灣…，主要都係靠幾條路出入，發展棕地連帶要開闢道路以便大家出入市區，搵地開路已經係一個問題。原有道路亦隨時要擴建先解決到新界人口因發展棕地而增加嘅問題，想像下原本雙線行車嘅公路，要擴建到6線甚至10線行車先夠用，個畫面幾壯觀，只係原本路面兩側有無足夠地方去搞擴闊工程呢？想像下彌敦道因為擴建，兩邊要有幾多大廈被移開，咁真係彌敦道變飛機跑道。

好多人對政府反感，政府做乜都反對，當然政府有好多事做得唔好，高鐵、港珠澳大橋、以致最嚴重嘅港鐵站，偷工減料加糊塗管理，政府也不見得會施予重罰，港鐵事故已漸趨常態，打工仔日日返工靠運氣。搵一班從來唔搭港鐵返工嘅管理層嚟管理港鐵，效果可想而知。但一事還一事，做個人工島，整個島無地理環境嘅限制而重新設計，成本也未必會貴得過收回棕地，而且人工島也可按比例，將某啲地段賣給發展商起私家樓，相信咁唔係燃燒儲備，可能賣地嘅收益更加能令我哋有用唔完嘅儲備。當然最緊要嘅並唔係儲備，而係大家認真諗諗，任何人都有自己反對嘅方向，但如果我哋唔快啲搞清楚個方向，好多市民就連企都冇定企。又或者採用復仇者聯盟3中魁隆的方法做，消滅一半人就騰出好多空間，只係你想成為化灰的一個，定你家人成為被消滅的一群？