標籤:社會

地從何來?

又或者採用復仇者聯盟3中魁隆的方法做,消滅一半人就騰出好多空間,只係你想成為化灰的一個,定你家人成為被消滅的一群?


大家常去嘅東京,係當年德川家康轉封江戶後,以愚公移山嘅精神去填海造地,改變河道,先打好發展基礎,可見不論古今,做人最緊要係有片立足之地。今日在香港,很多人已無立足之地,高球場、棕地、改建廠廈和什麼人工島,無論你好邊味,「地」也不能快到聽日就畀到你。

講到地從何來,成日聽到話收返粉嶺個高球場做住宅用地,我唔打高球,亦覺得打呢種波係好扮嘢,只係大家將公義掛在口邊時,點解容不下一個球場畀人打波消遣?因為球場用家多數係有錢人就必須收回起樓?咁收回球場是否打擊權貴嘅象徵意義大過實際意義呢?如果話高球場係浪費土地,咁應該一視同仁,康文署轄下4個高球場都要全數收回改建住宅。況且講到話高球場佔去唔少地皮,其實全港重有唔少網球場籃球場足球場…點解唔攞返去起樓呢?定係所有唔係富貴人家玩意,就可另作別論?

講到棕地,棕地業權同佢個位置一樣都係散散碎碎,單係同業權人傾收地條件都有排傾。就算收得齊,都要花一輪功夫將散佈唔同地區嘅棕地整合成為可發展地皮,先唔講時間,由收地到整合工程,當中涉及嘅金額係咪真係平得過填海做地呢? (據新聞講填海做地尺價為 HK$1300至HK$1500)。香港地,人人返工唔係返九龍就係香港島,即係銅鑼灣灣仔金鐘中環尖沙咀佐敦旺角官塘九龍灣…,主要都係靠幾條路出入,發展棕地連帶要開闢道路以便大家出入市區,搵地開路已經係一個問題。原有道路亦隨時要擴建先解決到新界人口因發展棕地而增加嘅問題,想像下原本雙線行車嘅公路,要擴建到6線甚至10線行車先夠用,個畫面幾壯觀,只係原本路面兩側有無足夠地方去搞擴闊工程呢?想像下彌敦道因為擴建,兩邊要有幾多大廈被移開,咁真係彌敦道變飛機跑道。

好多人對政府反感,政府做乜都反對,當然政府有好多事做得唔好,高鐵、港珠澳大橋、以致最嚴重嘅港鐵站,偷工減料加糊塗管理,政府也不見得會施予重罰,港鐵事故已漸趨常態,打工仔日日返工靠運氣。搵一班從來唔搭港鐵返工嘅管理層嚟管理港鐵,效果可想而知。但一事還一事,做個人工島,整個島無地理環境嘅限制而重新設計,成本也未必會貴得過收回棕地,而且人工島也可按比例,將某啲地段賣給發展商起私家樓,相信咁唔係燃燒儲備,可能賣地嘅收益更加能令我哋有用唔完嘅儲備。當然最緊要嘅並唔係儲備,而係大家認真諗諗,任何人都有自己反對嘅方向,但如果我哋唔快啲搞清楚個方向,好多市民就連企都冇定企。又或者採用復仇者聯盟3中魁隆的方法做,消滅一半人就騰出好多空間,只係你想成為化灰的一個,定你家人成為被消滅的一群?

妖怪當道

在萬聖節這個百鬼夜行,妖怪當道的時候,本來講下鬼故,或者其他搞怪的創意最應景。只不過因為一篇面書的貼文,激到髒神彈起,貼文大意是講及藝術需要有反省的機制,髒神對此深表不認同,認為藝術就是藝術,無必要加入反省機制,藝術著重的是意境及氛圍,並借講藝術及創作,講下香港社會人人講創意,但就唔講文化的現象。


 

百鬼夜行

講開百鬼夜行,其實都唔一定要等到萬聖節,平時我哋身邊,都好多妖魔鬼怪。


萬聖節好快就到,雖然同鬼有關,但就一d都唔恐怖,重非常歡樂,人人扮鬼扮馬上街慶祝。同樣以鬼為題的節日,盂蘭節就恐怖得多,長輩們話鬼門關大開,唔好去夜街,早d返屋企﹔在街見到錢又唔好執﹔當然唔好去游水,會畀水鬼拉去做替身……成個農曆七月陰風陣陣,大家盡量避免見鬼。萬聖節就百鬼夜行,唔怕你見,最怕你唔見。講開百鬼夜行,其實都唔一定要等到萬聖節,平時我哋身邊,都好多妖魔鬼怪。

就好似返工在辦公室就隨時見到陰濕鬼、自私鬼、死懶鬼,又有d口沒遮攔的嘩鬼,專係搬弄是非,或是非當人情。有d衰鬼,成班同事去食飯,佢總話唔記得帶錢,一句畀住先事後還,事後就無件事。到出街搭車,會撞到唔少自私鬼,打機睇片唔用耳機,自己high爆時就嘈到人,要知道唔係人人有興趣接受你的「分享」﹔另外在地鐵時,自私鬼們掛住打機睇片,塞住個車門,再唔係就挨落條柱到扮柱男柱女,見到呢類人就火滾,試過見有人在門邊玩手機,人潮落車時佢郁都唔郁,結果人潮一過就撞咗部機落地,果一刻我非常心涼。近年興講關公災難,其實都未算最恐怖,最怕有人關公上身,一面嚴肅,做咩都話要義字當頭,一副教化世人的面孔。只係面對自己時,就耶穌上身,一臉慈祥,自己做咩都可以寬恕。

妖魔鬼怪實在太多,或者下次有機會再講。其實講咁多,係想溫馨提示大家萬聖節眨眼就到,編輯部乘機搞下鬼,在無金禮聘,誠意搭夠下,邀請了各方朋友設計了過癮獨特的萬聖節造型,如果大家頭痕未諗到扮咩出去玩嘅,不妨參考下 (只係由髒神設計的造型,我諗大家都無咩可能扮到….),最後預祝大家萬聖節個個化身開心鬼,高高興興玩返晚。

由各方朋友設計的過癮造型如下﹕

顏色萬聖節

 

玩管弦樂的同人樂團

更多文化傳承的精彩內容,請按此

講到同人,第一時間可能是聯想到同人誌創作、販賣同人產品,或者參與角色扮演 (cosplay) 等等活動,可是今次介紹的同人組織,並非活躍於上述的活動,而是以演奏管弦樂為主,名為「香港同人管弦樂團」,按他們的介紹,他們應是全港唯一一個演奏管弦樂的同人組織,我們成功邀請到創團人S2及負責樂團日常運作事務的阿蕭傾下偈,講下營運樂團的心得及面對的問題。

據創辦人S2所講,沒有把樂團走向職業化的想法,只是營運一個組織,在在需財,如他們在訪問內提到,那怕是在排練室內的一卷廁紙,都全部都跟錢有關,決定不走上職業化的道路,到底令他們在營運樂團時,面對什麼難題,及有何解決方法呢?

作為同人組織,對動漫有所認識是必然的,放到樂團營運的理念上,在招募樂手時,又會否考考他們對動漫的熟悉程度呢?

更多內容,歡迎慢慢收聽。


雖然不是職業樂團,但演奏時都似模似樣,一絲不苟。
雖然不是職業樂團,但演奏時都似模似樣,一絲不苟。
持著「演奏管弦樂的同人組織」的理念,樂團招募樂手時,非常在意樂手的音樂水平。
持著「演奏管弦樂的同人組織」的理念,樂團招募樂手時,非常在意樂手的音樂水平。

膽色萬聖節—-遺體化妝大師Wendy Ma

更多文化傳承的精彩內容,請按此

萬聖節可能大家都會扮鬼扮馬出去玩。在一片歡樂氣氛下,這個原本屬於亡靈的節日再無半點恐怖的氣氛。講到恐怖氣氛,跟著介紹的這位朋友,她的工作環境可能對部份人來說夠哂恐怖,有請遺體化妝師 Wendy。

遺體化妝師馬小姐 (Wendy Ma)
遺體化妝師馬小姐 (Wendy Ma)

Wendy 從事這行16年,見盡各式死狀的屍體之餘,還要親手跟他們接觸,讓他們好好睇睇咁走畢人生最後的旅程,當中的確少點膽色也不行。遺體化妝師屬冷門職業中的冷門,Wendy 會講講自己入行的經過,並介紹下這行的概況。

作為替死者守尾門的人,Wendy 從家屬們對遺體處理的要求上,知道很多不同人生前的故事。對生意,她從不勉強,如她在訪問內提到,一般做生意講客源,她這行講的是「客緣」,是你就是你,強求無幸福。

多年來處理過不少遺體,最深刻及難過,莫過於替認識的人化妝,Wendy 將在節目內詳盡道出那種無奈及痛苦的感受。

更多內容,請慢慢收聽。


 

 

工作高峰期時,甚至要忙到對著屍體食飯,Wendy說由起初的食不下咽,到最後不當一回事
工作高峰期時,甚至要忙到對著屍體食飯,Wendy說由起初的食不下咽,到最後不當一回事
Wendy 的工具箱,開箱前她告誡道,可能會有強烈屍味湧出來,因為箱內所有工具都同屍體有頻密接觸。
Wendy 的工具箱,開箱前她告誡道,可能會有強烈屍味湧出來,因為箱內所有工具都同屍體有頻密接觸。
除了一般化妝品外,Wendy表示有時需要用到一些特別的物料協助化妝。
除了一般化妝品外,Wendy表示有時需要用到一些特別的物料協助化妝。
當遇到死唔眼閉時,針筒就有其用處。詳情請留意節內容。
當遇到死唔眼閉時,針筒就有其用處。詳情請留意節內容。
每副遺體背後,都有一個故事。
每副遺體背後,都有一個故事。

貪心貪到盡

貪心貪到盡,除了量外,更重要是質


上次借旅行講貪心無罪,只係去鎌倉時貪不得其法,就搞到唔湯唔水。今次就講下貪得其法下,點造就難忘之旅。去年遊東京,在計劃行程時已決定用一日時間行下位在箱根的小田原城,想去的理由好簡單,因為打機而對日本戰國時代的歷史產生了興趣,而小田原城在戰國時代有難攻不落之稱,自認係戰國粉絲,點可以唔去行下。

坐新幹線到達小田原站,離遠已睇到小田原城那屹立在山頂上的天守閣,那一刻忽發奇想,在戰國時代,有多少英雄豪傑為攻陷此城而費煞思量,幾多士兵為此拋頭顱灑熱血,在幾百年後的今日,我這個無拳無勇的遊客只花區區數十元買張入場劵,就可以施施然地穿過城門,隨處閒逛,不知他們泉下有知會有何感想呢?

通過護城河,穿城門而入,參觀沿路的博物館,看到與城主北條家有關的展品,也有各式刀具甲胄的展覽,最正有繁體中文解說,詳細地說明了每件鎧甲及刀具的每個部份,館內容許拍照,這些資料簡直係做模型的最好參考。單係這些博物館,都行咗2個幾3個鐘。

城內一道名為常盤木門的城門,其命名有段故,指門外種有大樹,希望大樹常青,寄意作為城主的北條家生生世世,長盛不衰。當時寒風颯颯,附近又無咩遊客,一片肅殺景象,我手按著厚身實木的城門。聯想到古往今來,無論皇侯將相,或大富之家,那個不想長盛不衰,不過歷史卻清楚地告訴我們,每個家族縱然曾經多麼輝煌,也總有沒落的一日。與其寄望家運不衰,不如先做好本份,兒孫自有兒孫福,後代的事又何必插手太多呢?

隨住在天守閣欣賞完相模灣的美景後,步出城門,心中若有所失,無論在戰國時代雄霸日本關東地段的北條家族﹔或把北條家掃出爭霸舞台,成功統一日本的豐臣秀吉﹔甚至是把盛極一時的豐臣家殺個清光,建立江戶幕府的德川家康,他們的功業是以無數人的鮮血為代價而成,諷刺的是,鬥生鬥死你爭我殺過後,大家也避不過同埋黃土的命運。那到底生前打生打死,價值係咩呢?

貪心貪到盡,除了量外,更重要是質,可能在好多人眼中,山長水遠去到日本,花一日時間去行一座城係一種浪費,不過這次「慢」遊小田原城的經歷,也許到了我八十歲也不會忘記,因為我真的與小田原城那些英魂有交流的感覺。


 

相關文章

貪字得個貧

貪字得個貧

我認我貪心,結果貪字得個貧,當時雙眼被個「貪」所遮,根本無法放開心靈,感受唔到鐮倉個氛圍。


轉眼間又到9月,每年年尾都有去日本旅遊的習慣,貪天氣涼爽又多海產食。今年打算在12月來個關西之旅,先去三大溫泉鄉之一的有馬,然後再遊大阪。有人問我你年年去日本,點解唔去下其他地方呢,其實我對旅行無咩興趣,只係喜歡去日本,你可以話我崇日,不過由細到大,玩嘅睇嘅食嘅都係日本嘢,加上日本出品,質素衰極有譜,好難唔愛上。

距離12月重有幾個月,心癢難耐時,上網搵下大阪有咩好玩好食,再唔係search 下有馬有咩溫泉旅館,或者重溫下之前遊日時影的相,都可稍稍止下痕。有晚無聊時,打開收費台的電影頻道,諗住搵套動作片陪我消磨慢慢長夜,只是一瞥間竟然見到[鐮倉物語]剛剛上架的廣告,記得去年在東京時,剛好撞正電影上畫,當時已諗住返香港睇,只係回來後忙東忙西,慢慢就唔記得咗。顧名思義,電影在鐮倉取景,心想就借電影回味下舊年的鐮倉之行,兼止下未能即時出發的心癮。

電影內容唔劇透太多,大概就是男女主角住在人鬼妖可以和平共處的鐮倉市,一天女主角高畑充希被奸鬼所害而枉死,男主角堺雅人前往黃泉拯救她的故事,整套電影彌漫著奇幻的感覺,加上出色的美術設定,片長2小時轉眼即過。對我嚟講,更重要是借電影回味下去年的鐮倉之行,看到江之電沿海行駛的一幕,D回憶即刻返哂嚟,從車廂內向外睇,一望無際的大海,看得人心情舒暢。不過除了江之電一幕外,其他場景卻勾不起我半點回憶,何解?因為無去到,例如鐮倉像徵之一的大佛…

去年是第二次遊東京,太多地方想去,每日行程都排到密過峰巢,確實去咗唔少地方,例如去台場睇高達,參觀信州上田城,遊覧有難攻不落之稱的小田原城,去海濱小鎮的鐮倉….等等。事後回想去鐮倉的那一天,感覺像浪費了。出發前,既想遊江之島,又想逛鐮倉, 總之貪多務得,細大不捐,結果江之島只到了外圍卻沒有上山,錯過了山上的眾多神社,及海天一色的美景。之後坐江之電往鐮倉,時間關係,遊不了大佛卻去了小町通的商店街大吃特吃,包括蕨餅與pan cake,好食係好食,不過呢D其實東京市內大把有得食。整個鐮倉之行,都在趕趕趕的節奏中進行,一心諗住唔好蝕底睇得就睇,結果卻蝕大底該睇嘅就無睇。

去旅行梗係想去到盡,可是就算人力無盡,時間也有限,就像我的鐮倉之旅,因為貪心,結果樣樣睇D唔睇D,既無廣度,又乏深度,正宗唔湯唔水,好彩同行的太太沒有埋怨。我認我貪心,結果貪字得個貧,當時雙眼被個「貪」所遮,根本無法放開心靈,感受唔到鐮倉個氛圍。

為了不再重蹈覆轍,嚟緊的關西之行,要做多點資料搜集,最緊要問清楚自己,真正想睇想去的係咩地方,咪人云亦云,去到遊雲,我唔想再回味旅程時,發覺原來好似無去過一樣。


相關文章

貪心貪到盡

 

第25集 有樓有成就?

曾經的一句有樓有高潮,引起唔少人的討論與批評,其實有樓何止有高潮,今天直頭唔少人視有樓為有成就的像徵。住屋固然重要,房屋問題亦困擾唔少香港人,但買到樓等如有成就,這種心態與想法是否狹窄了一點?我哋唔會離地到視現實問題於不顧,不過人生漫漫長路,若只著眼於區區置業的問題,會否有點浪費呢?


第24集 多留意,少錯過

髒神與雞口,兩個老sea food,一個老到爛一個老到臭,坐埋話下當年,不過就唔係講自己有幾威,畢竟兩條友仔都係凡 (煩)人一名,只是做了幾十年人,勉強叫做見證過下香港社會的變化,就由當年的生活講起,道出社會在不斷變化的過程中,我們或許錯過或忽略了的一些樂趣,呢D樂趣可以簡單到係搭車搭船時的感受,或等電視台開台前的期待。隨住社會的改變,有些事確實返唔到轉頭,不過用心留意身邊的事物,保持心靈的開放,就算在今日愈來愈同質化的香港,也可以找到不少樂趣。


 

 

後記﹕我哋習慣四圍去錄節目,今次就在銅鑼灣某大商場的美食廣場內錄,話說錄完節目的一刻,坐在隔離的一位男食客 (朋友,係講緊你) 好奇地問﹕「你哋錄緊網台節目?」 之後大家傾咗陣,就住節目內容講下大家對社會狀況及文化的睇法。如果將來大家撞到兩個人,對住個錄音機傾偈,有機會係我哋,到時歡迎打個招呼,傾下偈交流下。

為何要返工? (2)

始終在屋企做嘢,辦公時間隨著環境的改變而變得模糊 (雖則在辦公室可能都模糊,但起碼一踏出公司門口已叫放咗工),結果本來是朝9晚6 的辦公時間,隨時變成on call 36小時


在屋企返工當然爽,不用一早起身逼車逼地鐵,又慳到唔少車錢。計計下,如果慳到過去果十幾年的返工車費,可能夠我畀首期買樓。故上篇講在屋企辦公的編者話,不少朋友讀後也紛紛表示讚同。

打工仔固然享受在家辦公,不過凡事有利就有弊。在家中工作,老細們經常見你唔到,會否思疑你3點3去嘆個茶餐,嘆到4點3買埋餸先返呢。在屋企返工,老闆或同事們可隨時透過各種通訊工具聯絡你,這可能形成一個情況,就是一想到有事就立即call你,卻忘了原來你都有放工時間。始終在屋企做嘢,辦公時間隨著環境的改變而變得模糊 (雖則在辦公室可能都模糊,但起碼一踏出公司門口已叫放咗工),結果本來是朝9晚6 的辦公時間,隨時變成on call 36小時,間唔時傳媒都有講,打工仔最討厭老闆們的十大行為之一就係放工後仍然whatsapp問三問四,在屋企做嘢就有可能加劇呢個情況。

自去年創業,我就正式開始在家工作的日子,表面睇係幾正幾自在,當大家都在趕返工趕到甩頭甩髻時,我只要行3步就由睡房過到書房開工。只是大概2個月後,每朝只剩下自己一個在家,再想到樓上樓下人人都去返工時,就覺得自己好似無咩用,尤其生意淡薄時,感覺更加明顯。消除這種感覺的方法是早起,好多朋友都跟我講過同一番話:你做自己嘢,瞓到幾點起身都得啦。我的答案是應該比你晏,不過一定不會遲過8點,瞓到自然醒梗係爽,只是太晚起床,覺得自己無用的感覺會更強烈,因為只有無嘢做的人先可以瞓到想幾時醒就幾時醒。我堅持早起,看看早晨的陽光,甚至落去樓下花園走兩個圈,9點前準時坐到電腦前開始工作。這點很重要,因為客戶們一般都是9點開工,我一定要配合他們的工作節奏,我甚至試過早到8點9就收到客的電話,問我批貨能否如期到香港,如果我當時仍跟周公吹水的話,就肯定得失個客了。老實講,就算9點坐埋電腦旁,都不一定立即有工作,不過我盡量堅持這個動作,令自己進入作戰狀態,以應付隨時發生的狀況。  8點或之前起身是平時的指定動作,不過凡事都有例外。就像今年的世界盃,睇完幾場夜波,我都瞓到第二日差不多11點才起床。作為球迷豈能錯過這4年一度的盛事,就算唔睇足64場,都揀到至少4至6場睇,而且這是搬出來住後經歷的第一個大賽年,約埋朋友們睇波開心下就少不免。可能你會覺得我雙重標準,一時話要早起,轉頭為睇波又可以瞓晏D。這不是雙重標準,打自己工最重要的一點是安排工作的先後次序,例如法國對烏拉圭的8強戰,比賽在晚上12時結束,另一場的巴西對比利時在晚上2時開賽,這兩個鐘頭間太太及朋友們都去了睡覺休息,我卻跟髒神在開電話會,傾到差不多1點9先收線,之後洗個面,沖壺茶,剛好叫醒大家睇波。

關於時間的安排,其實上期都有講過下,今次就講多少少,在屋企返工,只要完成任務,無人會理你如何運用時間,尤其我呢種打自己工,彈性就更大。記得今年年頭有幾日都幾凍,果幾日我日間就優先處理客戶的查詢,留下一些事務性的工作,然後去街市買定食材,夜晚同老婆打邊爐,記得4點幾去到街市,見到除咗賣魚佬同豬肉佬外,其他都係女人,可能她們會想這個麻甩仔一定係失業人士,先會呢個時間來買餸,我就開心話之你,買完快快手返屋企準備晚餐,食飽後再處理未完成的事務性工作。

唔覺唔覺又一篇,憑個人經驗,在家返工只適合某些自我約束力強的人,畢竟球員係你,球證又係你,如果不能好好約束自己,就很易受到不同的誘惑干擾到工作效率。關於在家返工這個話題還有好多事可以傾,不過我都係時候約束下自己,先做埋手上其他工作,今次講住咁多先,如果大家有什麼想法,歡迎與我們交流,有機會再跟大家傾過。

 

相關話題

為何要返工?

造夢與做人